इंदापूर, २५ जून २०२५: युगप्रवर्तक श्री शाहू बहुउद्देशीय सेवा संस्था, महाराष्ट्र राज्य यांच्या वतीने राजश्री छत्रपती शाहू महाराज जयंतीनिमित्त आज लेखक श्री. महादेव चव्हाण यांना राजश्री शाहू पुरस्कार-२०२५ ने सन्मानित करण्यात आले. श्री चव्हाण यांनी आपल्या लेखनातून सामाजिक, शैक्षणिक आणि राजकीय क्षेत्रांत मोलाचे मार्गदर्शन केल्याबद्दल हा पुरस्कार प्रदान करण्यात आला. त्यांच्या उत्तम साहित्याबद्दल हा गौरव करण्यात आला.
लोकनेते शंकरराव पाटील सभागृह, पंचायत समिती, इंदापूर येथे हा सन्मान सोहळा पार पडला. यावेळी पुणे येथील प्रसिद्ध व्याख्याते मा. यशवंत गोसावी यांच्या शुभहस्ते श्री. चव्हाण यांना पुरस्कार प्रदान करण्यात आला.
श्री. महादेव चव्हाण यांनी विविध प्रकारच्या पुस्तकांचे लेखन केले आहे. त्यांच्या प्रकाशित पुस्तकांमध्ये 'देवमय' (कवितासंग्रह), 'माझ्या शाळेच्या आठवणी' (आत्मचरित्र), आणि 'ईर्षा' (ग्रामीण लेखसंग्रह) यांचा समावेश आहे. लवकरच त्यांची 'रानभेरी' (ग्रामीण कादंबरी), 'जावे त्यांच्या गावा' (प्रवासवर्णन), आणि 'संघर्ष योद्धा' (मनोगत) ही पुस्तके प्रकाशित होणार आहेत. विशेष म्हणजे, श्री. चव्हाण यांनी आपल्या लेखणीतून इंदापूरच्या इतिहासाला उजाळा देण्याचे महत्त्वपूर्ण काम केले आहे. त्यांचे लेखन सहज सोप्या ग्रामीण भाषेत असल्याने ते वाचकांना अधिक भावते.
या कार्यक्रमाला प्रमुख पाहुणे म्हणून मा. विठ्ठल आप्पा ननवरे, संघर्ष समितीचे प्रमुख प्राध्यापक कृष्णा ताटे सर, मा. नगरसेवक अशोक मखरे सर, सामाजिक कार्यकर्ते पोपटराव पवार, आणि हमीदभाई आत्तार उपस्थित होते. युगप्रवर्तक श्री शाहू बहुउद्देशीय सेवा संस्थेचे अध्यक्ष श्री. शिवाजी शिंदे, उपाध्यक्ष श्री. उत्तम गायकवाड, सचिव श्री. सुहास शेवाळे, आणि कार्याध्यक्ष श्री. अमोल खराडे यांच्यासह सर्व पदाधिकारी या प्रेरणादायी सोहळ्याला उपस्थित होते. त्यांच्या प्रेरणेतूनच हा सन्मान सोहळा आयोजित करण्यात आला होता.
महादेव चव्हाण यांच्या या सन्मानामुळे इंदापूरच्या साहित्यिक क्षेत्रात आनंदाचे वातावरण आहे. त्यांच्या पुढील साहित्यसेवेसाठी त्यांना खूप खूप शुभेच्छा!
