इंदापूर प्रतिनिधी : श्री. हमीद भाई आत्तार
दखनचा राजा आणि इंदापूर तालुक्याचे आराध्य दैवत असलेल्या श्री जोतिबा देवाची वार्षिक यात्रा गुरुवार, दिनांक २ एप्रिल २०२६ रोजी मोठ्या उत्साहात आणि भक्तीमय वातावरणात साजरी करण्यात आली. सकाळी देवाच्या मूर्तीला अभिषेक घालून यात्रेचा रीतसर प्रारंभ करण्यात आला. यावेळी जमलेल्या हजारो भाविकांनी 'जोतिबाच्या नावानं चांगभलं' असा जयघोष केल्याने संपूर्ण मंदिर परिसर आणि इंदापूर शहर दुमदुमून गेले होते.
यात्रेनिमित्त जोतिबाचा माळ येथील मंदिरात दर्शनासाठी भाविकांची मोठी मांदियाळी पाहायला मिळाली. प्रामुख्याने पुणे, सोलापूर आणि अहमदनगर जिल्ह्यातून हजारो भाविक दर्शनासाठी दाखल झाले होते. भाविकांची गैरसोय होऊ नये यासाठी श्री जोतिबा ट्रस्टच्या वतीने विशेष नियोजन करण्यात आले होते. दर्शनासाठी येणाऱ्या सर्व भाविकांना ट्रस्टतर्फे महाप्रसाद आणि थंड सरबतचे वाटप करून पाहुणचार करण्यात आला.
दुपारी ४ वाजता यात्रेतील मुख्य सोहळ्याला सुरुवात झाली. इंदापूरचे नगराध्यक्ष भरत शेठ शहा आणि जोतिबा देवस्थान ट्रस्टचे अध्यक्ष अरविंद वाघ यांच्या शुभहस्ते देवाची महाआरती करण्यात आली. महाआरतीनंतर दखनचा राजा श्री जोतिबा यांचा शाही छबिना ग्रामप्रदक्षिणेसाठी मार्गस्थ झाला. हा पालखी सोहळा पाहण्यासाठी आणि देवाचे आशीर्वाद घेण्यासाठी भक्तांनी रस्त्याच्या दुतर्फा मोठी गर्दी केली होती.
या सोहळ्याला परिसरातील मान्यवर आणि ग्रामस्थांची मोठी उपस्थिती लाभली होती. यामध्ये पुजारी रोहित जाधव, आश्विन जाधव, संदीप जाधव यांच्यासह बबनराव सूर्यवंशी, बाबासाहेब घाडगे, गोरख शिंदे, नगरसेवक अक्षय सुर्यवंशी, अतुल शेटे पाटील, अण्णा ढावरे, बाळासाहेब उंबरे, नारायण साळुंखे आणि कैलास कदम यांचा समावेश होता. सर्व उपस्थितांनी दर्शनाचा लाभ घेत धार्मिक विधींमध्ये सहभाग नोंदवला.
याव्यतिरिक्त हमीद आत्तार, महादेव चव्हाण, भारत बोराटे, जोतिराम सुर्यवंशी, मंगेश औताडे, हनुमंत बोंगाणे, शिवाजी मुखरे, संदिपान कडवळे आणि हनुमंत कांबळे इत्यादी मान्यवरही या प्रसंगी उपस्थित होते. प्रशासकीय आणि ट्रस्टच्या चोख नियोजनामुळे यात्रेचा हा मुख्य दिवस अत्यंत शिस्तबद्ध पद्धतीने पार पडला. रात्री उशिरापर्यंत भाविकांच्या रांगा मंदिर परिसरात पाहायला मिळत होत्या.
