निमसाखर (प्रतिनिधी: गणेश धनवडे):
इंदापूर तालुक्यातील निमसाखर गावामध्ये चैत्र पौर्णिमेचे औचित्य साधून श्री स्वामी समर्थ महाराजांचा उत्सव अत्यंत भक्तीमय वातावरणात आणि उत्साहात साजरा करण्यात आला. या मंगल दिनी श्री स्वामी समर्थ महाराजांची भव्य ग्राम प्रदक्षिणा काढण्यात आली होती. पालखी सोहळ्यासाठी नेहमीप्रमाणे श्री. राजेंद्र मारुती घोडे यांनी फुलांची आकर्षक सजावट केली होती, तर मंदिरामध्ये सौ. शितल सुनील टकले यांनी सुंदर रांगोळी काढून आपली सेवा अर्पण केली.
उत्सवाचे विशेष आकर्षण म्हणजे पंढरपूर येथील ह.भ.प. श्री. नागनाथ महाराज क्षिरसागर यांची झालेली प्रवचन सेवा. त्यांनी आपल्या निरूपणातून स्वामी समर्थांच्या कार्याचा आणि भक्तीचा महिमा भाविकांना सांगितला. प्रवचन सेवेनंतर श्री स्वामींची विधिवत आरती करण्यात आली आणि उपस्थित सर्व भाविकांनी सामूहिक नामजप करून स्वामी चरणी प्रार्थना केली.
धार्मिक कार्यक्रमांच्या जोडीला संगीतमय भजनाची जोड देण्यात आली होती. यामध्ये श्री. विनोद हनुमंत चव्हाण यांच्या भजनाचा विशेष कार्यक्रम पार पडला. त्यांना महादेव भजनी मंडळाने उत्तम साथसंगत केली. भजनाच्या सुरांनी संपूर्ण मंदिर परिसर दुमदुमून गेला होता, ज्यामुळे उपस्थित भक्तांमध्ये चैतन्याचे वातावरण निर्माण झाले होते.
या सोहळ्याची सांगता महाप्रसादाने करण्यात आली. यंदाच्या महाप्रसादाचे अन्नदाते म्हणून श्री. लहू पांडुरंग दरेकर यांनी मोलाची सेवा बजावली. भक्ती आणि श्रद्धेच्या या वातावरणात गावातील सर्व स्वामीभक्त आणि ग्रामस्थांनी दर्शन घेऊन महाप्रसादाचा लाभ घेतला. अन्नदानाची ही सेवा अत्यंत शिस्तबद्ध पद्धतीने पार पडली.
निमसाखर परिसरातील सर्व स्वामीभक्त या सोहळ्यासाठी मोठ्या संख्येने उपस्थित होते. हा संपूर्ण उत्सव यशस्वी करण्यासाठी गावातील विविध मंडळांनी आणि कार्यकर्त्यांनी परिश्रम घेतले. श्री स्वामी समर्थांच्या नामघोषाने आणि दिगंबरा दिगंबरा श्रीपाद वल्लभ दिगंबराच्या जयघोषाने निमसाखर गाव भक्तीरसात न्हाऊन निघाले होते.
