जागतिक पर्यावरण दिनाचे औचित्य साधून इंदापूर शहरात वृक्ष संजिवनी परिवार आणि इंदापूर नगरपरिषद यांच्या संयुक्त विद्यमाने भव्य वृक्षारोपण मोहीम राबवण्यात आली. जगद्गुरु संत तुकाराम महाराज पालखी स्थळ येथे आयोजित करण्यात आलेल्या या पर्यावरणपूरक उपक्रमात विविध प्रकारच्या सावली देणाऱ्या आणि पर्यावरणाचा समतोल राखणाऱ्या झाडांची लागवड करण्यात आली. गेल्या तीन वर्षांपासून वृक्ष संजिवनी परिवार शहरात अविरतपणे हा उपक्रम राबवत असून आजवर त्यांनी शहराच्या विविध भागात हजारो झाडे लावून त्यांचे यशस्वी संगोपन केले आहे.
या प्रसंगी उपस्थितांना मार्गदर्शन करताना वृक्ष संजिवनी परिवाराच्या अध्यक्षा सौ. सायराभाभी आत्तार यांनी वाढत्या प्रदूषणावर चिंता व्यक्त केली. त्यांनी सांगितले की, निसर्गाचा समतोल राखण्यासाठी वृक्ष लागवड ही काळाची गरज बनली आहे. जर आपण आज वृक्षारोपणाकडे दुर्लक्ष केले, तर भविष्यात त्याचे अत्यंत गंभीर आणि भयानक परिणाम संपूर्ण मानवी समाजाला भोगावे लागतील. त्यामुळे प्रत्येक नागरिकाने केवळ झाडे न लावता त्यांचे जतन करण्याची जबाबदारी घेतली पाहिजे, असे आवाहन त्यांनी केले.
या वृक्षारोपण मोहिमेअंतर्गत जगद्गुरु संत तुकाराम महाराज पालखी सोहळा स्थळाच्या परिसरात जैवविविधता टिकवून ठेवण्याच्या उद्देशाने विविध प्रजातींच्या रोपांची निवड करण्यात आली होती. यामध्ये प्रामुख्याने चिंच, बकुळ, भेंडी, वड, पिंपळ, गुलमोहर आणि टर्मेलिया यांसारख्या बहुगुणी व दीर्घायुषी झाडांचे अत्यंत नियोजनबद्ध पद्धतीने वृक्षारोपण करण्यात आले. इंदापूर नगरपालिकेच्या उद्यान विभागाच्या वतीने या झाडांच्या पुढील देखभालीसाठी योग्य व्यवस्था करण्यात येणार असल्याचे यावेळी स्पष्ट करण्यात आले.
या पर्यावरणपूरक कार्यक्रमाला इंदापूर शहरातील विविध क्षेत्रांतील मान्यवरांनी आणि महिलांनी मोठ्या संख्येने हजेरी लावली होती. वृक्षारोपण करताना जय नर्सिंग इन्स्टिट्यूटच्या सर्वेसर्वा सौ. लता नायकुडे, महिला पोलीस कॉन्स्टेबल माधुरीताई लडकत, वृक्ष संजिवनी परिवारच्या अध्यक्षा सायराभाभी आत्तार, रश्मीताई निलाखे, स्वाती अधटराव, इंदापूर नगर पालिका उद्यान प्रमुख अशोक चिंचकर, युवा क्रांती प्रतिष्ठानचे प्रशांतदादा सिताप, नागरी संघर्ष समितीचे प्रमुख प्रा. कृष्णा ताटे आणि ज्येष्ठ नागरिक संघाचे अध्यक्ष सुभाषदादा थोरात उपस्थित होते.
तसेच या मोहिमेत ॲड. आनंद केकान, जगद्गुरु संत तुकाराम महाराज पालखी सोहळा उत्सव समितीचे खुशाल महाराज कोकाटे, पतंजली योग समितीचे देवराव मते, वृक्ष संजिवनी परिवाराचे चंद्रकांत देवकर नाना, हमीदभाई आतार, महादेव चव्हाण, श्रीनाथ सेवा संस्थेचे प्रमुख हनुमंत बोंगाणे, भारत बोराटे, गजानन पवार, सूरज गानबोटे यांच्यासह इंदापूर शहरातील नागरिक व पर्यावरणप्रेमी मोठ्या संख्येने उपस्थित होते. सर्वांच्या सक्रिय सहभागामुळे हा जागतिक पर्यावरण दिनाचा कार्यक्रम अत्यंत उत्साहात आणि यशस्वीरीत्या संपन्न झाला.
