गुजरात मधील गांधीनगर येथे गौ विश्व विद्यापीठम् ( जीव्हीव्ही ) या संस्थेने आपल्या स्थापना दिनानिमित्त होमिओपॅथी व समन्वित पशु आरोग्य क्षेत्रातील अभ्यासक डॉ. शिवांग स्वामिनारायण यांची संस्थेच्या सल्लागार मंडळाचे सदस्य म्हणून नियुक्ती केली आहे. पशुधन आरोग्य, विशेषतः देशी गाईंचे संवर्धन, दुग्धव्यवसाय विकास आणि शाश्वत आरोग्य व्यवस्थांमधील त्यांच्या योगदानाची दखल घेऊन ही नियुक्ती करण्यात आली आहे. गुजरात राज्याचे राज्य मंत्री कांतीलालभाई अमृतिया यांच्या हस्ते तसेच जबलपुर स्थित गौसेवक स्वामी ऋषभदेवानंद यांच्या अध्यक्षतेखाली डॉ. शिवांग स्वामिनारायण यांना नियुक्ती बद्दल सम्मानित करण्यात आले.
गौ विश्व विद्यापीठम् ही संस्था देशी गोवंश, ग्रामीण अर्थव्यवस्था, नैसर्गिक शेती, पंचगव्य, दुग्धव्यवसाय, कौशल्य विकास, उद्योजकता, संशोधन आणि भारतीय पारंपरिक ज्ञानप्रणाली यांवर आधारित शिक्षण व नवोपक्रमांना प्रोत्साहन देण्यासाठी कार्यरत आहे. पारंपरिक भारतीय ज्ञान आणि आधुनिक वैज्ञानिक संशोधन यांचा समन्वय साधून ग्रामीण विकासाला चालना देणे हे संस्थेचे प्रमुख उद्दिष्ट आहे.
डॉ. शिवांग स्वामिनारायण यांनी होमिओपॅथी आणि समन्वित पशुवैद्यकीय आरोग्यसेवा क्षेत्रात विशेष कार्य केले आहे. दुग्ध पशुधनासाठी परवडणाऱ्या, सुरक्षित आणि शाश्वत आरोग्य उपाययोजनांच्या प्रसारासाठी त्यांनी विविध शैक्षणिक व संशोधन संस्थांसोबत सहकार्य केले आहे. पशुआरोग्य, प्रिव्हेन्टीव्ह आरोग्य सेवा आणि गौ संवर्धन मध्ये होमिओपॅथीच्या संभाव्य उपयोगितेचा अभ्यास व पुराव्या आधारित संशोधन पुढे नेण्यात त्यांचे महत्त्वपूर्ण योगदान मानले जाते. त्यांच्या कार्यातून देशी गाईंचे आरोग्य व्यवस्थापन, सामान्य पशुरोगांचे नियंत्रण, रासायनिक औषधे व प्रतिजैविकांवरील अवलंबित्व कमी करण्यात, शेतकऱ्यांचा उपचार खर्च घटविण्यात आणि नैसर्गिक पशु आरोग्य पद्धतींना प्रोत्साहन देण्यात होमिओपॅथीची भूमिका अधोरेखित झाली आहे. यामुळे दुग्धव्यवसायाची आर्थिक शाश्वतता, पशु उत्पादकता आणि ग्रामीण उपजीविका यांनाही बळ मिळू शकते.
डॉ. स्वामिनारायण यांचा होमिओपॅथी, सार्वजनिक आरोग्य आणि पशुवैद्यकीय संशोधन क्षेत्रातील अनुभव संस्थेच्या समन्वित पशु आरोग्य आणि ग्रामीण शाश्वततेच्या ध्येयाला अधिक बळकटी देण्यास मदत होईल असे संस्थेचे म्हणणे आहे. यावेळी डॉ. स्वामिनारायण म्हणाले, भारताच्या दुग्ध क्षेत्राला विद्यमान पशुवैद्यकीय व्यवस्थेला पूरक ठरणाऱ्या, शेतकरी हितैषी आणि वैज्ञानिक दृष्ट्या अभ्यासलेल्या आरोग्य मॉडेल्सचा मोठा लाभ होऊ शकतो. या माध्यमातून देशी गोवंश संवर्धन, परवडणारी आरोग्य सेवा आणि पर्यावरणीय समतोल यांना चालना मिळेल. या नियुक्तीमुळे पशुवैद्यकीय होमिओपॅथी, देशी ज्ञानप्रणाली, दुग्ध शाश्वतता आणि समन्वित पशु आरोग्यसेवा या क्षेत्रांमध्ये संशोधन व राष्ट्रीय स्तरावरील संवादाला नवीन दिशा मिळेल तसेच होमिओपॅथीची उपयुक्तता देखील सिद्ध होईल असा विश्वास त्यांनी शेवटी व्यक्त केला.
