दरवर्षीप्रमाणे शंकरराव पाटील चॅरिटेबल ट्रस्ट या वर्षीचा गणेशोत्सवही पर्यावरणपूरक आणि सामाजिक संदेश देणाऱ्या अनोख्या पद्धतीने साजरा करत आहे. संस्थेच्या अध्यक्षा मा. पद्माताई भोसले,सचिव डॉ.गिरीश देसाई, खजिनदार श्री.तुषार रंजनकर, विश्वस्त श्री.अरविंद गारटकर यांच्या मार्गदर्शनाखाली पर्यावरणाचे रक्षण आणि समाजप्रबोधन या दोन्ही गोष्टींचा समन्वय साधत, एक आगळावेगळा उपक्रम राबवण्यात आला आहे.
या उत्सवासाठी गणपतीची मूर्ती जुन्या वर्तमानपत्रांपासून बनवण्यात आली आहे. हि मूर्ती संस्थेच्या जावेद हबीब अकॅडमी विभागातील विद्यार्थ्यांनी बनवली असून मूर्तीची सजावट करण्यासाठी कागदी प्लेट्स आणि विविध प्रकारच्या कागदांचा वापर करून एक आकर्षक, देखावा तयार करण्यात आला आहे. विशेष म्हणजे, बाप्पांचे वस्त्र ट्रस्टच्या फॅशन डिझाइन विभागातील विद्यार्थ्यांनी तयार केले आहे, ज्यामुळे बाप्पांचे सौंदर्य अधिकच खुलून आले आहे.
या वर्षीच्या गणेशोत्सवाचा मुख्य विषय "मोबाईल व्यसनमुक्ती" आहे. मोबाईलच्या अतिवापरामुळे समाजात निर्माण होत असलेल्या समस्यांबाबत जनजागृती करणे हा यामागील मुख्य उद्देश आहे. यासाठी गणेश मूर्तीसमोर मोबाईल व्यसनमुक्ती संदर्भातील देखावे ठेवले आहेत त्याच सोबत मोबाईल व्यसनमुक्तीवर आधारित विविध उपक्रम आयोजित करण्यात येणार आहेत. या माध्यमातून समाजात जागरूकता निर्माण करण्याचा प्रयत्न केला जात आहे.
दि.२७ ऑगस्ट २०२५ रोजी संस्थेत गणेश मूर्तीची स्थापना करण्यात आली. गणेशस्थापना सोहळ्यात ट्रस्टचे विश्वस्त श्री. अरविंद गारटकर, आरोग्य केंद्र प्रमुख श्री.महादेव चव्हाण, कोपिवरची शाळा प्रमुख श्री.भारत बोराटे, कार्यकर्ते श्री.हमीद अत्तार प्रमुख पाहुणे म्हणून उपस्थित होते. त्यांच्या हस्ते पूजाविधी पार पडला. यावेळी त्यांनी विद्यार्थ्यांच्या सर्जनशीलतेचे कौतुक केले आणि सांगितले की, "गणेशोत्सव हा समाजाला योग्य दिशा देणारा उत्सव आहे. पर्यावरणपूरक उत्सवाबरोबरच मोबाईल व्यसनमुक्तीचा महत्त्वपूर्ण संदेश दिला जात आहे. हा उपक्रम खरंच खूप प्रेरणादायी आहे."
या कार्यक्रमाला ट्रस्टचे इन्चार्ज श्री.दिपक जगताप, प्रोजेक्ट ऑफिसर श्री.सागर कांबळे, जावेद हबीब विभाग प्रमुख श्री.अमोल राऊत, फॅशन डिझाइन विभाग प्रमुख सौ.त्रिशला पाटील, ब्युटी विभागाच्या सौ.रोहिणी जाधव, भारत माने उपस्थित होते पर्यावरणपूरक आणि समाजप्रबोधनात्मक गणेशोत्सव समाजासाठी एक आदर्श उदाहरण ठरेल, असा विश्वास आयोजकांनी व्यक्त केला.
हा कार्यक्रम यशस्वी करण्यासाठी तसेच मूर्ती व डेकोरेशन यांचे काम करण्यात संस्थेच्या जावेद हबीब विभागातील विद्यार्थीश्रद्धा पवार, आदिती पवार, पुनम गवळी, सुरज जाधव, विजय दळवी, प्रीतम करगळ, विजय गोरे, आदित्य वाघमारे, जॅस्मिन बडकर, पवन नामदास, सपना गायकवाड यांनी तर फॅशन डिझाइन विभागातील शितल राठोड, अथर्व सरोदे, समिक्षा कवितगे, वैष्णवी गुणवरे, जिनत सय्यद,सिंधू जाधव, साक्षी यादव, मंदा ढावरे , आरती कुंभार, अश्विनी बाबर या विद्यार्थ्यांनी मेहनत घेतली. त्यांच्या या मेहनतीमुळे गणेशोत्सवास शोभा आली.
