इंदापूर : प्रतिनिधी
इंदापूर शहरातील राजवेलीनगर येथील प्रसिद्ध दर्गा हजरत सय्यद ताजुद्दीन राजबागसवार बाबांच्या वार्षिक उरूस उत्सवाला मोठ्या उत्साहात आणि परंपरेनुसार बुधवारपासून (दि. ११) सुरुवात झाली आहे. या दोन दिवसीय सोहळ्यासाठी संपूर्ण दर्गा परिसर अतिशय आकर्षक अशा विद्युत रोषणाईने उजळून निघाला असून, भाविकांच्या दर्शनासाठी मोठी गर्दी पाहायला मिळत आहे. शहर आणि परिसरातील धार्मिक सलोख्याचे प्रतीक म्हणून या उत्सवाकडे पाहिले जाते.
उत्सवाच्या पहिल्या दिवशी बुधवारी दुपारी असरच्या नमाजनंतर पारंपारिक 'संदल मुबारक' (चंदन उटी) सोहळ्याने उरूस कार्यक्रमाचा शुभारंभ करण्यात आला. सुगंधी फुलांच्या चादरी आणि संदल मिरवणुकीने वातावरणात चैतन्य निर्माण केले होते. यावेळी उपस्थित भाविकांनी बाबांच्या दरबारी नतमस्तक होऊन सुख-समृद्धीसाठी प्रार्थना केली. हिंदू-मुस्लिम बांधवांनी एकत्र येत या धार्मिक विधींमध्ये सहभाग नोंदवून सामाजिक ऐक्याचा संदेश दिला.
आज उत्सवाच्या दुसऱ्या दिवशी, गुरुवारी (दि. १२ मार्च) धार्मिक विधींसोबतच सामाजिक उपक्रमांवर भर देण्यात आला आहे. सायंकाळी मगरिबच्या नमाजनंतर राजबागसवार दर्ग्यासमोर 'लंगर-ए-खाना' म्हणजेच भव्य आम दावत आयोजन करण्यात आले आहे. या दावतचा लाभ घेण्यासाठी परिसरातील शेकडो नागरिक उपस्थित राहण्याची शक्यता असून, त्यादृष्टीने उरूस कमिटीने चोख नियोजन केले आहे.
या उरूस सोहळ्याच्या नियोजनासाठी उरूस कमिटीचे अध्यक्ष समाधान जाधव, उपाध्यक्ष आदित्य राखुंडे आणि अरबाज शेख यांच्यासह राजेवलीनगर मित्र मंडळाच्या सर्व सदस्यांनी विशेष परिश्रम घेतले आहेत. राजवेलीनगरमधील रहिवासी आणि कार्यकर्त्यांनी एकत्र येत पाहुण्यांच्या स्वागताची आणि सुव्यवस्थेची सर्व तयारी पूर्ण केल्याची माहिती कमिटीच्या वतीने देण्यात आली आहे. यामुळे येणाऱ्या भाविकांना कोणत्याही अडचणीविना दर्शन घेता येत आहे.
पुढील दोन दिवस चालणाऱ्या या सोहळ्यात विविध सांस्कृतिक आणि धार्मिक कार्यक्रमांची रेलचेल राहणार आहे. केवळ इंदापूर शहरातूनच नव्हे, तर तालुक्यातील ग्रामीण भागातूनही अनेक भाविक या उरूसानिमित्त दर्शनासाठी दाखल होत आहेत. या उत्सवामुळे शहरात आनंदाचे आणि उत्साहाचे वातावरण असून, सर्वस्तरातून या उत्सवाचे स्वागत केले जात आहे.
