पुणे: डिजिटल पेमेंट क्षेत्रात क्रांती घडवून आणल्यानंतर, आता 'फोनपे' (PhonePe) या आघाडीच्या कंपनीने आपल्या प्लॅटफॉर्मवर कृत्रिम बुद्धिमत्ता अर्थात 'एआय' (AI) तंत्रज्ञानाचा वापर सुरू केला आहे. ग्राहकांना अधिक चांगला अनुभव देण्यासाठी कंपनीने 'एआय-पॉवर्ड नॅचरल लँग्वेज सर्च' (Natural Language Search) हे नवीन फिचर सादर केले असून, यामुळे मोबाईल ॲपमधील कामे अधिक वेगाने आणि सोप्या पद्धतीने पूर्ण करता येतील.
नेमके काय आहे हे नवीन फिचर?
फोनपेने मायक्रोसॉफ्ट फाऊंड्रीच्या मदतीने हे प्रगत तंत्रज्ञान विकसित केले आहे. यामध्ये युजर्सना केवळ टाईप करून किंवा आवाजाद्वारे (Voice Command) आदेश देऊन ॲपमधील विविध कामे करता येतील. पारंपारिक नेव्हिगेशनऐवजी युजर्स आता थेट संवाद साधून पेमेंट प्रक्रिया पूर्ण करू शकतील.
उदाहरणार्थ: युजरने "पे हेमंत २० रुपये" किंवा "रिचार्ज फास्टॅग" असे म्हटल्यास, ॲपमध्ये संबंधित इंटरफेस आपोआप उघडला जाईल. यामुळे तांत्रिक माहिती नसलेल्या ग्राहकांसाठीही हे ॲप वापरणे अत्यंत सुलभ होणार आहे.
तंत्रज्ञान आणि सुरक्षा
दिल्लीतील 'एआय इम्पॅक्ट समिट २०२६' मध्ये या उपक्रमाची माहिती देण्यात आली. फोनपेचे राहुल चारी यांनी स्पष्ट केले की, "आम्ही केवळ व्यवहार पूर्ण करण्यासाठी नव्हे, तर युजर्सच्या गरजा समजून घेणाऱ्या अधिक इंटेलिजन्स इंटरफेसकडे वळत आहोत." हे तंत्रज्ञान 'ऑन-डिव्हाइस' आणि 'क्लाउड' आधारित हायब्रीड मॉडेलवर काम करते, ज्यामुळे ग्राहकांच्या वैयक्तिक डेटाची गोपनीयता आणि सुरक्षितता जपली जाते.
महत्वाची वैशिष्ट्ये:
* सुलभ वापर: साध्या आवाजातील आदेशावरून पेमेंट आणि रिचार्ज करणे शक्य.
* मायक्रोसॉफ्टचे सहकार्य: मायक्रोसॉफ्ट इंडियाचे अध्यक्ष पुनीत चंडोक यांनी या उपक्रमाला पाठिंबा दिला असून, डिजिटल पेमेंट अधिक सुरक्षित आणि लवचिक होईल असा विश्वास व्यक्त केला आहे.
* उपलब्धता: हे स्मार्ट फिचर टप्प्याटप्प्याने संपूर्ण भारतात उपलब्ध करून दिले जाणार असून, ते सर्च बार, मदत केंद्र आणि हिस्ट्री टॅबद्वारे वापरता येईल.
या नवीन तंत्रज्ञानामुळे भारतातील वेगाने वाढणाऱ्या एआय इकोसिस्टमला अधिक बळकटी मिळणार आहे.
